Organización do evento

O VI Foro da cidadania e da comunicación é un encontro científico que convoca anualmente o Grupo de Investigación Cidadanía e Comunicación, CIDACOM, da Universidade de Santiago de Compostela, para contrastar e compartir as liñas de investigación que preocupan ao Grupo e para consolidar relacións coas institucións e entidades da Sociedade civil que exercen o seu labor nos eidos da Cidadanía e da Comunicación. Até de agora se abordaron temas como o Terceiro Sector e a comunicación; Cidadanía e documental; Prensa e cidadanía; Cidade e Comunicación e Comunicación e Ben público.

Nesta edición o encontro divídese en diferentes actuacións: o encontro a celebrar nos días 8 e 9 de novembro; o obradoiro de medios e migración que terá lugar ás tardes dos días 10 a 12 de novembro e o ciclo documental sobre migración que se proxectará polas mañás deses mesmos días, do 10 ao 12 de novembro.

O Encontro pretende ser un punto de exposición e debate respecto dos obxectivos académicos deseñados polo CIDACOM, mediante conferencias, comunicacións e mesas redondas para o debate.

O Obradoiro de Migración e Medios ten un carácter divulgativo e participativo, oriéntase a estudantes das distintas titulacións e graos das universidades galegas e pretende contar coa colaboración de profesores, profesionais, asociacións de migrantes e institucións para desenvolver criterios de análise e boas prácticas comunicativas respecto da migración e dos migrantes.

O ciclo de Documental quere achegar as distintas realidades da migración ao público xeral. As producións, provintes de institucións e de entidades que traballan neste eido, serán comentadas por expertos nas temáticas abordadas co ánimo de interesar aos asistentes no debate.